एच.पी.भी खोप अभियान बारे जानकारी गराउन भरतपुरमा प्रभातफेरी

चितवन, माघ २०–  पाठेघरको मुखको क्यान्सर हुनबाट जोगाउन किशोरीहरुलाई सुरु गर्न लागिएको एच.पी.भी खोप अभियान बारे जानकारी गराउन आइतबार विहान भरतपुरमा प्रभातफेरी निकालिएको छ ।

जनस्वास्थ्य कार्यालय चितवन र भरतपुर महानगरपालिका जनस्वास्थ्य प्रवद्र्धन शाखाको संयुक्त आयोजनामा भरतपुरको चौबिसकोठीबाट प्रभातफेरी निकालिएको हो । प्रभातफेरीमा स्वास्थ्य क्षेत्रमा अध्ययन गरिरहेका विद्यार्थी, सरोकारवाला निकायलगायतको सहभागितामा निस्किएको प्रभातफेरि भरतपुरको विभिन्न ठाउँमा पुगेर गेष्टहाउस चौरमा पुगी समापन भएको थियो । जनस्वास्थ्य कार्यालय चितवनका भेक्टर कन्ट्रोल निरीक्षक राम केसीले एच.पी.भी खोप बारे आममानिसलाई जानकारी गराउन सांकेतिक रुपमा प्रभातफेरि निकालिएको जानकारी दिए ।